Адрас:
223311, Мінская вобл.,
г.Беразіно, вул. Кастрычніцкая, 18
Тэлефон:+375 (1715) 5-58-41

 

26.07.2019 16:56

“ШЭРЫФ” НА КАМБАЙНЕ

“ШЭРЫФ” НА КАМБАЙНЕ

 

Так жартаўліва паміж сабой называюць камбайнеры адкрытага акцыянернага таварыства “Брадзец” Сяргея Мікалаевіча Собаля. Робяць гэта земляробы з павагай у голасе, бо малады мужчына - участковы інспектар міліцыі Бярэзінскага РАУС. Паважаюць яго ў аграгарадку Брадзец не толькі за міліцэйскія пагоны. Вось ужо каторы год запар старшы лейтэнант міліцыі ў свой водпуск па ўласным жаданні дапамагае вяскоўцам на жніве. Сёлета пагадзіўся працаваць памочнікам камбайнера ў вопытнага земляроба Віталія Мікалаевіча Аўсянскага.   

          

 -Некалькі сезонаў адпрацаваў старшым камбайнерам у суседняй гаспадарцы -  адкрытым акцыянерным таварыстве “Багушэвічы”, - расказвае малады мужчына, -  адзін год памочнікам у мяне была нават жонка. Аднак зараз яна ў дэкрэтным водпуску, гадуе дзяцей у горадзе, а я на гарачы час пераехаў да бацькоў, у Брадзец.                                               

Сяргей Мікалаевіч  родам з гэтай вёскі, дзе яму здаўна вядомы ўсе ўрочышчы і палеткі. Тут дагэтуль рупіцца вадзіцелем у мясцовай гаспадарцы яго бацька. Неаднойчы ён называўся ў ліку лепшых работнікаў на жніве і сёння нязменна задае тон уборачнай кампаніі. Дзякуючы бацьку, Сяргей рана захапіўся тэхнікай і паспяхова скончыў Беларускі аграрна-тэхнічны ўніверсітэт. Праўда, юнацкаму намеру вярнуцца працаваць у родную гаспадарку не наканавана было збыцца. Пасля выканання воінскага абавязку паклікала брадзецкага хлопца суровая міліцэйская служба.

— Шчыра скажу, нават не ведаю, што лягчэй - злодзеяў лавіць і з выпівакамі змагацца ці вось так сядзець у кабіне камбайна ў чаканні сонечнага надвор’я, альбо, намалаціўшы ўсяго адзін бункер, вяртацца на машынны двор  з-за дажджоў, -   расказвае мужчына. – Машына напагатове, збожжа каласіцца. настрой рашучы, а неба зацягнута вялікімі шэрымі хмарамі. Таму сярод хлебаробаў пакуль няма найбольш важнай тэмы ў размовах, а як навіны надвор’я.     

Сяргей Мікалаевіч у водпуску да сярэдзіны жніўня і спадзяецца, што нябесная канцылярыя змілуецца і  дазволіць камбайнерам без спешкі ўбраць вырашчаны ўраджай.Пэўны хлебаробскі вопыт падказвае яму: сухое надвор’е яшчэ наступіць і дазволіць убраць шчодрую ніву да зярнятка. 

- Сонечных дзён мы просім усёй камандай земляробаў,  ды і нашым сямейным хлебаробскім  атрадам, - зазначае Сяргей  Аляксандравіч , - а ён складаецца не толькі з мяне і бацькі, але і молодшага брата. Ён у нас выратавальнік і працуе ў раённым аддзеле па надзвычайных сітуацыях. Аляксандр   пайшоў па бацькавых сцежках.  Шмат гадоў спраўна ў час жніва працаваў на адвозцы збожжа і сёлета  ў свае выхадныя  дні  шчыруе на “МАЗе” ў суседняй гаспадарцы “Месціна” . Такі наш сямейны падрад аберагае людзей і нясе дабрабыт!      

 Мілана ТРАПЯНОК.

 Фота Юліі БУКЕЛЬ.

23 разоў (а)