У арганізацыі падворка Мінскай вобласці майстрамі Бярэзінскага раёна была арганізавана выстава работ дэкаратыўна-прыкладной творчасці «Александрыйскі кірмаш», праведзены майстар-класы па вырабе драўляных лыжак, пляценні кошыкаў з лазы, пляценні паясоў, вырабе тэкстыльных лялек. Асновай мастацкага афармлення і зместу экспазіцыі была прэзентацыя народнага беларускага касцюма бярэзінскага строю.
На ўрачыстай цырымоніі адкрыцця свята творчая група прыняла ўдзел у парадзе-дэфіле касцюмаў традыцыйных строяў. На сцэне быў прадстаўлены традыцыйны варыянт мужчынскага і жаночага касцюмаў Ігуменскага павета Мінскай губерні (цяпер Бярэзінскі раён), які быў распаўсюджаны ў канцы XIX – пачатку XX стагоддзяў. Вылучэнне бярэзінскага строю сярод астатніх - гэта спалучэнне некаторых архаічных рыс: лаканічнасць арнаменту кампазіцый, прастата геаметрычных матываў, стрыманасць каларыту, у якім асноўнае месца займаў шараваты колер ільняной тканіны.
