Гаспадар пачаў рабіць звыклае - распальваць печку ў лазні. Праз некаторы час людзі пачулі трэск, выбеглі з хаты. На той час ужо гарэў дах лазні. Як высветлілася, металічная печка ў лазні была самаробная, мела металічны комін, ад перанакалу якога і пачала гарэць драўляная столь. Людзі не пацярпелі.
З-за парушэнняў нормаў пажарнай бяспекі пры эксплуатацыі і ўсталяванні печы нярэдка гараць жылыя дамы, гінуць у агні людзі. 40 працэнтаў пажараў у Бярэзінскім раёне ў гэтым годзе адбыліся з-за няспраўных печаў і парушэнняў людзьмі павілаў карыстання імі. Так, у аграгарадку Лешніца гарэў хляўчук, у весцы Журавок - нежылы дом. У аграгарадку Капланцы з-за недастатковай супрацьпажарнай раздзелкі загарэўся дом, а праз некаторы час у тым жа населеным пункце гарэла гаспадарчая пабудова. З-за перанакалу печы ў Беразіно загарэлася лазня, а ў садовым таварыстве “Гурэшчына” - лазня. У весцы Костаўшчына растапліванне печкі закончылася пажарам, апекі атрымалі пенсіянеры.
Каб не прыйшлося прасiць дапамогі па тэлефоне 101, памятайце:
- самая надзейная печка – з чырвонай цэглы, яе комін павінен быць з гэтага ж матэрыялу;
- у печы не павінна быць расколін, а комін трэба пабяліць вапнавым растворам. Робіцца гэта для таго, каб на белым фоне можна было заўважыць новыя расколіны;
- у ацяпляльны сезон ачышчайце комін ад сажы адзін раз у 3 месяцы;
- печ і дымавая труба ў месцах злучэння з драўлянымі перакрыццямі павінны мець патаўшчэнне цаглянага мура - разделку;
- каб вуглі, што выпалі з печкі, не прывялі да пажару, прыбіце перад топкай на драўляным падлозе металічны ліст памерамі 50х70 см;
- ні ў якім разе не выкарыстоўвайце пры падпалцы лёгкаўзгаральныя і гаручыя вадкасці;
- небяспечна пакідаць адчыненымі топачныя дзверцы, гэта прамы шлях да пажару;
- трымайце не менш як за паўтары метры ад печы вопратку, мэблю, дровы і іншыя гаручыя матэрыялы;
- попел і перагарэлае вуголле выкідвайце не бліжэй за 10 метраў ад будынкаў;
- не пакідайце без нагляду печку, што топіцца, і не дазваляйце дзецям самастойна іх распальваць.
Вольга Данэйка, iнспектар прапаганды Бярэзiнскага раённага аддзела па надзвычайных сiтуацыях
